أحلى يوم فى حياتى

إيييييييييييييييييييييه ... دنيييييييييييييييييييا

الواحد الظاهر كبر ولا ايه يا رجالة ، على أى حال .. الحمد لله

الواحد كان لسه اول امبارح يا جماعة كان بيفكر هينزل ازاى من البيت علشان يلعب مع العيال فى الشارع

صحابى القدام .. أحمد طيطه .. وخيشة .. ومصطفى الأردنى

ولسه الواحد كان بيفكر فى هدوم العيد والكوتش الأميجو اللى معاه راديو هدية

اقولكم بقى ايه حكاية الراديو ده .. الراديو ده بقه كان ........

لا لا لا .. مش وقت حكايات دلوقتى

القصد يا جماعة من الموضوع ان الواحد لقى نفسه مرة واحدة مخلص الكلية ومخلص الجيش واشتغل

وشوية شوية لقيت نفسى اتجوزت

لكـــــن

إنى أبقى أب ... ده اللى ما كانش على البال ولا الخاطر

لكن ده اللى حصل

مع إنى عارف انى مراتى حامل وهتولد ... لكن الواحد ما كانش عارف ان الموضوع صعب اوى وحلو اوى كدا

الواحد بدأ يصدق كلام الأفلام بتاع (دا النظرة فى وش عيالك بالدنيا) والحاجات اللى من النوع ده

مش عاوز اطول عليكم فى اول مدونة بعد ما بقيت أب .. لكن كان لازم اوصف لكم شعورى دلوقتى